Հայաստանի 6-րդ Միջազգային բժշկական համագումարի համանախագահ Գևորգ Յաղջյանը հանդիպել է
Վիրաբուժական էնդոսկոպիայի հայկական ասոցիացիայի վարչության անդամների հետ։ Հանդիպման ընթացքում
ներկայացվել է ասոցիացիայի կողմից կատարված աշխատանքները, ինչպես նաև 2023 թվականին նախանշված
գործողությունները։

Այս համատեքստում անդրադարձ է կատարվել նաև 2023 թվականին կայանալիք “Yerevan endoscopic days”
եռօրյա կոնֆերանսին, որի աշխատանքները Վիրաբուժական էնդոսկոպիայի հայկական ասոցիացիայի նախագահ
Արման Պետրոսյանի առաջարկով համակարգելու է Մոնտեվիդեոյի (Ուրուգվայ) մարսողական էնդոսկոպիայի
իսպանական ասոցիացիայի ծառայության ղեկավար, Մարսողական էնդոսկոպիայի միջամերիկյան ընկերության
նախագահ, Ավրորա ֆորումի բարի կամքի դեսպան Դոկտոր Ասադուր Խորխե Չեքմեջյանը:

Ներկայացնելով Հայաստանի 6-րդ միջազգային բժշկական համագումարի նախապատրաստական աշխատանաքների
ընթացքը՝ Գևորգ Յաղջյանն առաջարկել է “Yerevan endoscopic days” եռօրյա կոնֆերանսը ներառել 6-րդ
ՀՄԲՀ շրջանակում և այն անցկացնել բուն կոնգրեսին նախորդող կամ հաջորդող սատելիտային սիմպոզիումների հետ
միասին։